લાલ આતંકના અંધકારથી વિકાસના અજવાળા સુધી: બસ્તરથી દિલ્હી સુધી અમિત શાહે રજૂ કર્યો ‘નક્સલમુક્ત ભારત’નો વિજયી રોડમેપ!
"રેડ કોરિડોર" થી લઈને "અર્બન નક્સલવાદ" સુધીના પડકારો પર પ્રહાર કરતા અમિત શાહનું આ વક્તવ્ય સાબિત કરે છે કે હવે ભારતની આંતરિક સુરક્ષા "ઉગ્રવાદ"ના અંધકારમાંથી મુક્ત થઈને "વિકાસ"ના અજવાળા તરફ મક્કમ ડગલાં માંડી રહી છે.
કુલ દૃશ્યો |
કેન્દ્રીય ગૃહમંત્રી અમિત શાહે લોકસભામાં નક્સલવાદના મૂળિયાં ઉખેડી ફેંકવા માટે ભારત સરકારની મક્કમ રાજકીય ઈચ્છાશક્તિનો પરિચય આપતા ‘નક્સલમુક્ત ભારત’નો સ્પષ્ટ રોડમેપ રજૂ કર્યો છે. તેમણે હિંસાના માર્ગને ત્યજીને વિકાસની મુખ્યધારામાં જોડાવા આહવાન કરવાની સાથે સ્પષ્ટ કર્યું કે, લોકશાહીમાં હથિયાર ઉઠાવનારાઓને હવે જડબાતોડ જવાબ આપવામાં આવશે. વર્ષોથી વિકાસથી વંચિત રહેલા આદિવાસી વિસ્તારોમાં શિક્ષણ, આરોગ્ય અને ઈન્ફ્રાસ્ટ્રક્ચર દ્વારા રાજ્યનો વિકાસ કરી, ૨૦૨૬ સુધીમાં ડાબેરી ઉગ્રવાદનો સંપૂર્ણ સફાયો કરવાની વ્યૂહરચના આ વક્તવ્યમાં પ્રતિબિંબિત થાય છે. 'રેડ કોરિડોર' થી લઈને 'અર્બન નક્સલવાદ' સુધીના પડકારો પર પ્રહાર કરતા અમિત શાહનું આ વક્તવ્ય સાબિત કરે છે કે હવે ભારતની આંતરિક સુરક્ષા 'ઉગ્રવાદ'ના અંધકારમાંથી મુક્ત થઈને 'વિકાસ'ના અજવાળા તરફ મક્કમ ડગલાં માંડી રહી છે.
અમિત શાહના વક્તવ્યના મુખ્ય અંશો...............
૧. નક્સલમુક્ત ભારતનો સંકલ્પ: ગૃહમંત્રીએ સ્પષ્ટ કર્યું કે વડાપ્રધાન નરેન્દ્ર મોદીના નેતૃત્વમાં ભારત હવે નક્સલવાદના અંતિમ તબક્કામાં છે અને ટૂંક સમયમાં દેશ સંપૂર્ણપણે નક્સલમુક્ત બનશે.
૨. વિકાસમાં અવરોધ: તેમણે જણાવ્યું કે નક્સલવાદ ગરીબીનું કારણ નથી, પરંતુ નક્સલવાદને કારણે જ આ વિસ્તારોમાં દાયકાઓ સુધી ગરીબી રહી છે કારણ કે ઉગ્રવાદીઓએ શાળાઓ, હોસ્પિટલો અને રસ્તાઓ બનવા દીધા ન હતા.
૩. બંધારણીય સર્વોપરિતા: લોકશાહીમાં હિંસાનું કોઈ સ્થાન નથી. જો કોઈને અન્યાય થતો હોય તો તેનો ઉકેલ અદાલત અને બંધારણ દ્વારા લાવી શકાય, હથિયાર ઉઠાવીને નહીં.
૪. રેડ કોરિડોરનો અંત: એક સમયે ૧૨ રાજ્યોમાં ફેલાયેલો 'રેડ કોરિડોર' હવે અત્યંત મર્યાદિત થઈ ગયો છે. છત્તીસગઢના બસ્તર જેવા વિસ્તારોમાં પણ હવે રાજ્યની પકડ મજબૂત થઈ છે.
૫. શહીદોને શ્રદ્ધાંજલિ: નક્સલવાદ સામેની લડાઈમાં શહીદ થયેલા સી.એ.પી.એફ (CAPF) અને રાજ્ય પોલીસના ૫,૦૦૦થી વધુ જવાનોના બલિદાનને ગૃહમંત્રીએ બિરદાવ્યું હતું.
૬. વિકાસની પહોંચ: છેલ્લા ૧૨ વર્ષમાં નક્સલ પ્રભાવિત વિસ્તારોમાં ૧૭,૫૮૯ કિમી રસ્તા મંજૂર કરાયા, ૫,૦૦૦થી વધુ મોબાઈલ ટાવર અને હજારોની સંખ્યામાં બેંક શાખાઓ તથા પોસ્ટ ઓફિસ ખોલવામાં આવી છે.
૭. શસ્ત્ર છોડવાની અપીલ: સરકારે સ્પષ્ટ નીતિ જાહેર કરી છે કે જે નક્સલીઓ હથિયાર છોડશે તેમનું પુનર્વસન કરવામાં આવશે, પરંતુ જે ગોળી ચલાવશે તેને ગોળીથી જ જવાબ અપાશે.
૮. વિદેશી વિચારધારા પર પ્રહાર: નક્સલવાદની વિચારધારા રશિયા અને ચીનથી પ્રેરિત છે, જેનો ઉદ્દેશ્ય ભારતીય લોકશાહી અને સંસદીય પ્રણાલીનો વિરોધ કરી સશસ્ત્ર ક્રાંતિ દ્વારા સત્તા મેળવવાનો છે.
૯. અર્બન નક્સલવાદ: શહેરોમાં રહીને નક્સલીઓની વકીલાત કરતા બુદ્ધિજીવીઓની ટીકા કરતા તેમણે કહ્યું કે, આ લોકો નિર્દોષ આદિવાસીઓ અને જવાનોના મૃત્યુ પર મૌન રહે છે.
૧૦. આદિવાસી કલ્યાણ: મોદી સરકારમાં આદિવાસીઓને ગેસ કનેક્શન, આવાસ, શુદ્ધ પાણી અને ૫ કિલો મફત અનાજ જેવી પાયાની સુવિધાઓ છેવાડાના વિસ્તારો સુધી પહોંચાડવામાં આવી છે.
૧૧. સુરક્ષા એજન્સીઓનું સંકલન: NIA, ED અને ઇન્ટેલિજન્સ એજન્સીઓ દ્વારા નક્સલીઓના ફંડિંગ અને સપોર્ટ સિસ્ટમ પર કઠોર પ્રહાર કરવામાં આવ્યો છે.
૧૨. ભૂતકાળની સરકારોની ટીકા: ૧૯૭૦થી ૨૦૧૪ સુધી કોંગ્રેસના શાસનકાળમાં આ સમસ્યા કેમ વકરી અને શા માટે આદિવાસીઓ વિકાસથી વંચિત રહ્યા તેવા પ્રશ્નો તેમણે ઉઠાવ્યા હતા.
૧૩. સલવા જુડુમ અને ન્યાયતંત્ર: તેમણે ભૂતકાળના કેટલાક ન્યાયિક નિર્ણયોની ટીકા કરી જેણે રાજ્ય સમર્થિત જન આંદોલનોને નબળા પાડ્યા હતા.
૧૪. શિક્ષણ પર ભાર: બસ્તરના દરેક ગામમાં શાળાઓ બનાવવાની ઝુંબેશ ચલાવવામાં આવી છે જેથી યુવાનો નક્સલવાદના રસ્તે ન ભટકે.
૧૫. ઝીરો ટોલરન્સ પોલિસી: કાશ્મીર હોય કે પૂર્વોત્તર ભારત, ગેરકાનૂની પ્રવૃત્તિઓ ચલાવી લેવામાં આવશે નહીં અને રાજ્યની સત્તા મજબૂત કરવામાં આવશે.