મુખપૃષ્ઠ વાર્તા । ૩ । આ હિન્દુ ઓળખને ભૂંસવાનું આંતરરાષ્ટ્રીય ષડયંત્ર છે..

 

 

 

 

ભારતીય લોકતંત્ર અને સામાજિક ન્યાયના માળખાને તોડવા માટે અત્યારે એક અત્યંત ગંભીર અને ઊંડું ષડયંત્ર ચાલી રહ્યું છે. આ ષડયંત્ર છે- અનુસૂચિત જાતિ (SC)ના લોકોનું મતાંતરણ કરાવવું એવો ભરોસો આપીને કરાવવું કે, તમારા SCના લાભોને કોઈ જ નુકસાન નહીં, ઉલટાનું વધારામાં લઘુમતી તરીકેના લાભો પણ મળતા થશે. અને મતાંતરણ પછી પણ તેમને તે જ જાતિના લાભો અપાવવા માટે કાનૂની અને સામાજિક લડાઈ લડવી. આ ષડયંત્રની પાછળ રહેલા લોકોની મંશા ક્યારેય આધ્યાત્મિક કે ધાર્મિક પરિવર્તનની રહી નથી, પણ શુદ્ધ રૂપે આર્થિક અને રાજકીય લાલચની રહી છે. મતાંતરણના આ કાળા ખેલમાં ગરીબ અને ભોળાં અનુસૂચિત જાતિનાં પરિવારોને લક્ષ્ય બનાવવામાં આવે છે. તેમને એવું સમજાવવામાં આવે છે કે, હિન્દુ ધર્મમાં તેમનું શોષણ થાય છે, પણ જેવું મતાંતરણ થઈ જાય કે તરત આ જ ષડયંત્રકારીઓ તેમને શીખવે છે કે, ‘તમારે કાગળ પર તો હિન્દુ જ રહેવાનું છે, જેથી સરકારી અનામત, સ્કોલરશીપ અને નોકરીના લાભો તમને મળતા રહે.’ આ એક અત્યંત ખતરનાક બેવડી રમત છે. જેનો અર્થ એ થયો કે આસ્થા ખ્રિસ્તી રાખવી પણ લાલચ માટે જૂની હિન્દુ ઓળખનો ઉપયોગ કરવો. સમજવા માટે આજકાલ તેને ક્રિપ્ટો-ક્રિશ્ચયન કહેવામાં આવે છે.

 

 

આ કાવતરું કોઈ ગલી-કૂંચીમાં ચાલતું છૂટક કામ નથી, પરંતુ તે અબજો ડોલરના વિદેશી ફંડિંગથી ચાલતું એક સુનિયોજિત આંતરરાષ્ટ્રીય ષડયંત્ર અને ક્રિપ્ટો ક્રિશ્ચિયન નેટવર્ક છે. આ નેટવર્કની કાર્યપદ્ધતિ શતરંજની રમત જેવી છે. આ રમત એટલી ગૂઢ છે કે સામાન્ય નાગરિક તેને સમજી પણ ના શકે. આમાં એવા લોકો સામેલ છે, જેઓ પોતાને ‘માનવ અધિકારના રક્ષક’ કે ‘સામાજિક કાર્યકર’ તરીકે ઓળખાવે છે, પરંતુ તેમનો અસલી એજન્ડા ભારતને અંદરથી ખોખલું કરી નાંખવાનો છે.

 

 

ભારતને અંદરથી ખોખલું કરવાની ત્રણ મુખ્ય ધરીઓ છે. આ ષડયંત્રનો પ્રથમ અને સૌથી મોટો આધારસ્તંભ છે વિદેશી મિશનરીઓ પાદરીઓ: આ લોકો ‘ચર્ચ પ્લાન્ટિંગ’ અને ‘સોલ હાર્વેસ્ટિંગ’ (આત્માઓની લણણી) વગેરેના નામે વિદેશી ધરતી પરથી હજારો કરોડનું ફંડ મેળવે છે. આ નાણાંનો ઉપયોગ કરીને તેઓ ભારતના અંતરિયાળ વિસ્તારોમાં ગરીબ અનુસૂચિત જાતિનાં-જનજાતિનાં પરિવારોને શિક્ષણ, સ્વાસ્થ્ય અને વિદેશ પ્રવાસની જાળમાં ફસાવી મતાંતરિત કરે છે. તેમનો ઉદ્દેશ્ય માત્ર ધર્મ બદલવાનો નથી, પણ ભારતની હિન્દુ વસ્તી ઘટાડીને પોતાની ધાર્મિક સત્તા સ્થાપવાનો છે.

 

આ ષડયંત્રની બીજી ધરી છે ડાબેરી (Leftists) વિચારધારા ધરાવતા લોકો : ડાબેરીઓ હંમેશા ભારતની એકતા તોડવા માટે ‘ભાગલા પાડો અને રાજ કરો’ની નીતિ અપનાવે છે. તેઓ દલિત ભાઈ-બહેનોમાં ‘મૂળનિવાસી’નો અત્યંત ભ્રામક અને ઝેરી રાગ આલાપે છે. તેઓ એવું જૂઠાણું ફેલાવે છે કે, હિન્દુ ધર્મ અને ભારતની સંસ્કૃતિ તેમના પર (એટલે કે અનુસૂચિત જાતિના- જનજાતિ લોકો પર) બહારથી થોપવામાં આવી છે. આ રીતે તેઓ દલિતોના મનમાં પોતાની જ મૂળ સંસ્કૃતિ પ્રત્યે નફરત પેદા કરીને તેમને હિન્દુ ધર્મથી વિખૂટા પાડે છે, જેથી મતાંતરણનો રસ્તો સાવ સરળ બની જાય.

 

ત્રીજી અને સૌથી ઘાતક ધરી છે કથિત સેક્યુલર બુદ્ધિજીવીઓ અને વકીલોની ટોળકી : આ લોકો એસી ઓફિસોમાં બેસીને કાનૂની કાવતરાં કરે છે. અદાલતોમાં મતાંતરિતોને અનામત અપાવવા માટે કાનૂની લડાઈઓ લડે છે. તેઓ ૨૦૦૭ના રંગનાથ મિશ્રા કમિશનના અર્ધસત્ય અહેવાલનો શસ્ત્ર તરીકે ઉપયોગ કરે છે. તેઓ એવી કુતર્કપૂર્ણ દલીલ કરે છે કે, ‘જો વ્યક્તિ ખ્રિસ્તી બની જાય તો પણ તેનું સામાજિક પછાતપણું જતું નથી.’ વાસ્તવમાં આ દલીલ પાછળનો બદઇરાદો એ છે કે, જો એકવાર મતાંતરિત ખ્રિસ્તી કે મુસ્લિમોને SC અનામતનો લાભ મળી જાય, તો દેશમાં ધર્મ પરિવર્તનની ગતિ રાતોરાત અનેક ગણી વધી જાય.

 

આમ આ ત્રણેય ધરીઓ ભયાનક રીતે કામ કરી રહી છે. આ ત્રણેયનું જોડાણ ભારતની હિન્દુ ઓળખને ભૂંસી નાખવા માટે એક તાંતણે બંધાયેલું છે. તેઓ જાણે છે કે જો હિન્દુ સમાજ વિખેરાઈ જશે તો ભારતને તોડવું સરળ બની જશે. (પણ ભારતની ઓળખ ભૂંસવી કોઈનાથી શક્ય નથી.) વાસ્તવમાં આ ગેંગ ભારતના સાચા અનુસૂચિત જાતિ-જનજાતિના લોકોના અધિકારોની ચોરી કરી રહી છે.

 

 

કોઈને લાગી શકે છે કે આ બધું હમણા હમણાં શરૂ થયું લાગે છે. પણ ના, આ ષડયંત્ર કોઈ રાતોરાત ઊભું થયેલું ગાંડપણ નથી, પરંતુ તેનાં મૂળિયાં બ્રિટિશ શાસનકાળ જેટલાં ઊંડાં અને ઝેરી છે. અંગ્રેજોએ મિશનરીઓને ખુલ્લો દોર આપ્યો હતો

જેથી કરીને તેઓ ભારતના સામાજિક તાણાવાણાને તોડી-મરોડી શકે. પણ આઝાદી પછી જ્યારે રાષ્ટ્રપતિનો આદેશ (The Constitution (Scheduled Castes) Order, 1950) જાહેર થયો અને તેમાં કહેવામાં આવ્યું કે અનુસૂચિત જાતિના લાભો માત્ર હિન્દુ, શીખ અને બૌદ્ધ ધર્મ પાળનારાઓને જ મળશે, ત્યારે મિશનરીઓના પગ નીચેથી જમીન સરકી ગઈ હતી. કારણ કે, આ આદેશથી તેમનો ‘મતાંતરણનો ધંધો’ ઠપ્પ થઈ રહ્યો હતો. ત્યારથી જ, વિદેશી તાકાતોના ઇશારે આ બંધારણીય કવચને તોડવાના વધારે ખતરનાક પેંતરા શરૂ થઈ ગયા હતા.

 

વર્તમાન સમયમાં આ ષડયંત્રકારીઓએ એક નવો અને અત્યંત ભ્રામક શબ્દપ્રયોગ વહેતો મૂક્યો છે, એ છે - ‘દલિત મુસ્લિમ’ અને ‘દલિત ખ્રિસ્તી’. કાનૂની અને ધાર્મિક રીતે આ શબ્દો પરસ્પર વિરોધી છે. ઇસ્લામ અને ખ્રિસ્તી પંંથ એવો દાવો કરે છે કે તેમનામાં કોઈ જ્ઞાતિવાદ નથી અને બધા સમાન છે. જો ત્યાં બધા સમાન જ હોય, તો પછી ‘દલિત’ શબ્દનો ઉપયોગ શા માટે કરો છો? આ માત્ર એક ગંદો પ્રોપગેન્ડા છે, જેનાથી ભોળા અનુસૂચિત જાતિના લોકોને એવી જાળમાં ફસાવી શકાય કે, ‘તમે ધર્મ બદલી નાખો, અમે તમને સુપ્રીમ કોર્ટ દ્વારા અનામત અપાવી દઈશું.’ અને આગળ કહ્યુંં તેમ આ ષડયંત્ર પાછળ લાખો કરોડનું ભંડોળ ખર્ચવામાં આવી રહ્યું છે.

 

સૌથી વધુ દુ:ખની વાત એ છે કે, આ લોકો ડૉ. બાબાસાહેબ આંબેડકરનું નામ વટાવીને આ બધું કરી રહ્યા છે.

ડૉ. બાબાસાહેબે ક્યારેય એવું નહોતું કહ્યુંં કે, મતાંતરિત થઈને પણ હિન્દુ અનામતના લાભો ચાલુ રાખવા જોઈએ. આ ષડયંત્રનો મૂળ હેતુ સાચા અનુસૂચિત જાતિના લોકોના હકોની ચોરી કરીને ભારતને અંદરથી નબળું પાડવાનો છે.

 

 

 

આ અમેરિકા સ્થિત એક અત્યંત શક્તિશાળી મિશનરી સંગઠન છે, જેનું કામ વિશ્વભરની જ્ઞાતિઓનો ડેટાબેઝ તૈયાર કરવાનું છે. તેઓ ભારતના દલિત સમુદાયોને લક્ષ્ય બનાવીને મતાંતરણ માટે વ્યૂહાત્મક ફંડિંગ પૂરું પાડે છે.

 

 

 આ સંસ્થા આંતરરાષ્ટ્રીય મંચો પર ‘દલિત ખ્રિસ્તી’ મુદ્દાને માનવ અધિકારો સાથે જોડીને ભારત સરકાર પર દબાણ લાવવાનું કામ કરે છે, જેથી બંધારણીય સુધારો કરાવી શકાય.

 

 

આ સંસ્થાઓ ઘણીવાર એવા અહેવાલો તૈયાર કરે છે જે દર્શાવે છે કે, મતાંતરિત ખ્રિસ્તીઓ સાથે ભેદભાવ થાય છે, જેનો ઉપયોગ કથિત સેક્યુલર વકીલો સુપ્રીમ કોર્ટમાં પુરાવા તરીકે કરે છે.

 

***

 

આ સંસ્થાઓનો અંતિમ હેતુ ધાર્મિક પરિવર્તન દ્વારા ભારતની સામાજિક એકતામાં ભંગાણ પાડીને વૈશ્વિક સ્તરે ભારતની સ્થિતિ નબળી પાડવાનો છે.