દીવમાં એક એવી જેલ છે જેમાં માત્ર એક કેદી રહે છે. ૪૭૨ વર્ષ જૂની આ જેલમાં આ એક કેદી સિવાય અહીં કોઈ નથી. આ કેદીનું નામ છે દીપક કાંજી જેની ઉંમર છે ૩૦ વર્ષ. રિપોર્ટનું માનીએ તો ૩૦ વર્ષીય દીપકને ૪૦ લોકો માટે બનેલી આ જેલમાં રાખવામાં આવ્યો છે, જ્યાં તેને કેટલીક સવલતો પણ આપવામાં આવે છે, જેમ કે ટીવી પર દૂરદર્શન અને કેટલીક આધ્યાત્મિક ચેનલો જોવાનું અને ગુજરાતી અખબાર અને પત્રિકાઓ. આ ઉપરાંત સાંજે ૪થી ૬ની વચ્ચે ગાર્ડ તેને ફરવા માટે લઈ જાય છે. દીપક એકમાત્ર કેદી છે જે આ જેલમાં બંધ છે. આ માટે તેના ખાવા-પીવાનો બંદોબસ્ત પણ જેલની પાસે આવેલી એક રેસ્ટોરાંમાંથી કરવામાં આવે છે. હાલમાં તો દીપક આ જેલમાં બંધ છે પરંતુ તેને કોઈ અન્ય જેલમાં મોકલવાની વાત ચાલી રહી છે. ત્યાર બાદ આ ઐતિહાસિક સ્થળને ભારતીય પુરાતત્ત્વ સર્વેક્ષણને સોંપી દેવામાં આવશે.